Da sunan Allah mai rahama mai jin kai, tsira da aminci su kara tabbata ga Annabi MUHAMMAD da Iyalan gidan sa tsarkaka.
Shahadar Sayyida Zahra (s.a) lamari ne tabbatacce na tarihi wanda ingantattun ruwayoyin Shi’a da Sunna suka ruwaito, kuma babu wani Shi’a ko Sunna mai adalci da ba son zuciya da zai iya musanta shi.
Bisa ga abin da tarihi ya tabbatar, Sayyida Zahra (s.a), bayan wafatin Annabi (s.a.w.a), ta shiga cikin rashin lafiya sakamakon abin da ya faru lokacin da wasu daga cikin sahabbai suka kai hari zuwa gidanta, suka kunna wuta a kofar gida da dai makamantan wannan. Wannan ya janyo ta kwanta rashin lafiya har ta yi shahada bayan ɗan lokaci kaɗan a Madina.
An binne gawar ‘yar Manzon Allah (s.a.w.a) da daddare cikin sirri bisa wasiyyarta, kuma ba a taɓa sanin ainihin kabarinta ba har yanzu.
A cikin kalandar rayuwar Sayyida Fatima (A.S), kamar yadda abin yake a rayuwar sauran ma’asumai (A.S), akwai sabani tsakanin masana tarihi da masu ruwaito hadisai.
Wannan sabani ya samo asali ne, fiye da komai, daga raunin tsarin rubutu da adana tarihi a wancan lokacin; musamman ma saboda masu rubuta tarihi da masu hadisin lokacin ba sa ba da muhimmanci sosai ga batutuwan da suka shafi ranakun haihuwa ko wafati. Irin waɗannan sabanin ma suna wanzuwa, kusan iri ɗaya, game da Annabi Muhammadu (S.A.W) kansa.
Amma sabanin da ke cikin kalandar rayuwar Sayyida Zahra (S.A) ya fi wanda aka samu a game da sauran ma’asumai, kuma alamu na nuna cewa hakan ya samo asali ne daga jinsinta — kasancewarta mace — wanda hakan ya sa bayanai game da rayuwarta suka kasance kaɗan kuma ba a rubuta suba sosai. A taƙaice, akwai ruwayoyi guda 13 game da ranar shahadar Sayyida Fatima Zahra (S.A). wanda saboda nufin takaita rubutu ba za mu Ambato sub a sai dai Mafi shahara daga cikin ranar da aka fi sani game da shahadar Sayyida Zahra (S.A) shi ne kwanaki 95 bayan wafatin Manzon Allah (S.A.W) wanda ya yi dai dai da uku ga watan jimada thani.
Ala ayyi halin akwai maganganu da ruwayoyi masu yawa daga Ahlul-baiti (a.s) wanda su ke tabbatar da cewa Sayyidah Fatima (A.S) za’a zalumce ta wanda hakan zai kai ga shahadar ta (a.s) wanda a wannan rubutu zamu ambaci kadan daga cikin wadannan ruwayoyi.
Imam Muhammad al-Baqir (s.a) ya ruwaito daga Imam Zayn al-‘Abidin (a.s), shi kuma ya ruwaito daga Muhammad ɗan ‘Ammar Yasir, cewa mahaifinsa ‘Ammar ya ce:
“Sayyida Faṭima (s.a) tana ɗauke da juna biyu—Sayyid Muḥsin (a.s). Bayan wafatin Annabi (ṣ.a.w.a) da waɗancan fitintinu suka same Ahlul Baiti, aka kai hari gidanta, suka kuma ja ɗan kawunta, Amirul-Mu’minin (a.s) waje. Abubuwan da wancan mutumin (Umar) ya aikata ne suka sa tayin da Sayyida Faṭima (a.s) take ɗauke da shi ya zube, kuma wannan ne ya janyo ciwonta da shahadarta.”
An ruwaito daga Ibn ‘Abbas cewa:
“Wata rana a Dhi-Qar na ziyarci Amirul-Mu’minin (a.s). Sai ya fito min da wani littafi ya ce: Ya Ibn ‘Abbas, wannan littafin ne Annabi (ṣ.a.w.a) ya bayyana mini, kuma da rubutuna na hannuna ne.
Na ce: Ya Amirul-Mu’minin (s.a), ku karanta mini.
Sai ya karanta littafin, kuma a cikinsa an rubuta duk abin da zai faru tun daga lokacin shahadar Annabi (ṣ.a.w.a) har zuwa lokacin shahadar Imam Husain (a.s), yadda za a kashe shi, wa zai kashe shi, wa zai taimake shi, da waɗanda za su yi shahada tare da shi.
Sai Imam ya yi kuka ƙwarai, ya kuma sa ni na yi kuka. Daga cikin abin da ya karanta mini akwai bayanai kan abin da za su yi masa, da yadda Sayyida Faṭima (s.a) za ta yi shahada.
lallai wannan ruwayoyin da aka ambata a sama suna tabbatar da shahadar Assayyida Zahara (A.S)
